ASAL KATA PARHALADO - HAPARHALADOON DI HKI

Keterangan Gambar: Survey Model GEBADA di HKI Daerah X Kepri (21/2/2024) Foto: Pdt. Boy Tampubolon

Lapatan ni Tohonan dohot Haparhaladoon.

Di habatakon uju i dipangke do hata “Tohonan” gumodang tu angka ulaon ni angka raja manang ihutan. Alai dung masuk haKristenon hata “Tohonan” dipangke tu angka ulaon parhuriaon. Molo didok “ulaon”, karejo”, manang “jabatan” tu angka na mangula di huria masongehu lapatanna. Ido umbahen na dipangke hata ‘tohonan’, jala sian hata i do ro hata ‘partohonan’ ima na mangula, na marhalado di huria na ginoaran parhalado. Hata ‘tohonan, marlapatan “jambar manang sijaloon”. Manang parpeak ni hundulan na jinalo dohot na ni ampehon tu sada halak di ulaon na marhadohoan. Isarana di ulaon adat, ndang boi paunsaton jambar ni tulang tu jambar ni boru. Nunga diaturhon hian i hombar tu dalihan na tolu. Laos songoni do peak ni parhundul, ndang boi hundul di halanguluhundul pamoruan, jambar dohot tohonan ni hulahula di disi. Arga do di halak Batak jambar dohot tohonan i, muruk do sada halak molo so digorahon hasuhuton hombar tu jambarna manang tohonanna, nang pe holan holiholi na pinasahatna i, arga jala hasangapon do i dinamanjalosa molo digorahon tohonanna. 

Angkup ni hata tohonan adong do hata “parhalado” na marharoroan sian hata “parhal” dohot “ado”. Hata “parhal” sian hata “marhal” lapatanna “manjaga”. Berarti molo parhal ima angka panjaga. Di harbangan ni sada huta na jolo adong do parhal laho manjaga huta i asa aman sian angka musu, panangko, d.n.a. hata “ado” ima sian na ginorahon ni angka parhal huhut mamalu angka sarune tanduk manjou “ado-ado”. Sian ulaon i, parhalado na jolo di halak Batak mangaramoti huta dohot pangisi ni huta. Domu tusi do pangantusion ni ‘parhalado’ di huria. Dipillit Debata do angka parhaladoNa laho mangaramoti tondi ni jolma.

Ise do i angka parhalado di huria ima sintua, sada sian parhalado na di huria i. adong do tolu hata di Padan Naimbaru na mangalehon pangantusion taringot tu lapatan ni sintua ima “presbiteros” na marlapatan na dianggap uluan ala ni parbinotoan dohot pengalaman na godang jala na timbo taringot tu parhuriaon. Na paduahon ima “episkopos” na marlapatan simatamatai, on huria. Digoari sahalak episkopos ala ibana ma na mangulahon ulaon admistrasi dohot na mangatur pardalan dohot parhobas ni angka ulaon na di huria i. na patoluhon ima “poimen” na marlapatan parmahan, ilaonna ima marmahani angka ruas. Marmahani ruas berarti mangaramoti, mangajari, patureturehon na marsahit dohot na pogos. Asa tohonan sintua ima sada tohonan na pinasahat tu sahalak jolma ala ni parbinotoanna, parange dohot pamboantononna manang pangulahononna tua jala tiruan di natorop. 

Songon dia do pangulahonon ni angka SINTUA?

Hombar tu 1 Timoteus 3:1-13 songonon ma sijagaon manang siulahonon  ni sintua ima unang adong dapot sisurahan, harajaan ni sada boruboru ma ibana, marpangontik, marroha, marhapantunon, na las roha martamue, na malo mangajari, unang ma sisobur tuak, unang pangalinsingi, alai na lambok, pardame jala so impolan di perak; na malo mangarajai donganna sabagas, paranakhon sioli ajar mardongan sandok hahormatan; ai molo so diboto mangarajai isi ni bagasna, tung songon dia paturetureonna bagas ni Debata?, unang gabe ginjang rohana; jala madabu maon tu bagasan uhum ni sibolis; ingkon denggan do baritana di angka

halak na dibalian asa unang ibana madabu tu bagasan panginsahion dohot sambil ni sibolis; ingkon toman; unang mardua hata; unang pangomo sian dalan na so tama; angka na umpeop hahomion ni haporseaon di bagasan roha na ias.  

Keterangan Gambar: Pelatihan Model GEBADA kepada Parhalado HKI Bekasi Timur (23/2/2024) Foto: Timothy Saragi

Syarat-syarat na gabe sintua:

1. Porsea tu Tuhan Jesus. Sahalak sintua ingkon na tangkas do haporseaonna tu Tuhan Jesus jala ingkon porsea ibana na jinou ni Tuhan i do ibana gabe parhobas di huria i.
2. Badia di parange. Ndada otomatis tohonan i mambahen sada halak gabe badia. Ingkon badia do tohonan i dirajumi roha jala ingkon badia tohonan i pataridahonon niparange ni partohonan i. 
3. Gabe tiruan. Didok di Jakobus 1:22 ‘gabe siula hata i ma hamu unang ma holan pananginangi angka na paotootohon dirina”. Godang di sian tongatonga ni parhalado holan di hata do malo, hape parjuji, parmabuk, pangotootoi, parbada, dna. Alai impola ni pandohan i, ingkon naeng ma nian ingkon tiruan di parange, panghataion, pardongansaripeon dohot diparianakhonon. Jala molo songoni do parange ni sintua, marsahala ma ibana di tohonan i jala tangi ma ruas umbege hatana.
4. Na ringgas marsiajar. Didok di 2 Timoteus 3:14, sahalak sintua ingkon na ringgas manjaha manambai parbinotoanna. Ala bidang jala godang do ulaon ni sintua, ingkon ringgas do sintua marsiajar manambai parbinotoanna taringot tu theologi dohot parbinotoan na asing na hombar tu ulaon i. 
5. Partangiang. Ndang tingkos sahalak sintua molo so sipartangian. Sude ulaon ni sintua sai jumolo ma dipungkadi bagasan tangiang jala diujungi dohot tangiang.
6. Malo mamparhaseang tingki. Ingkon disiplin do sada halak sintua mamangke tingki. Unang ma gabe jumolo sahalak ruas sahat tu gareja sian sintua. 

RIMPUN NI ULAON SIRADOTAN NI SINTUA HOMBAR TU AGENDA HKI. 

1. Dongan jala pangurupi ni pandita manghobasi ulaon di HKI, manjamitahon hata ni Debata na tarsurat di Padan Narobi dohot Padan na Imbaru.
2. Marmahani dohot manangkasi parange nang ulaon ni ruas ni huria. Molo adong na hurang denggan parange ni manang ise ruas ni huria, ingkon pinsangon ni sintua marhitehite hata ni Debata, manang paboaon tu guru dohot pandita asa dipature.
3. Manogunogu ruas ni huria asa ringgas marminggu, mandohoti sakramen, dohot angka parpunguan na pinatupa ni huria i.
4. Manogunogu jala mandasdas angka dakdanak, asa ringgas ro tu parmingguon mangguruhon hata ni Debata. 
5. Manopot jala mangapuli angka na marsak, na dangol, na pogos dohot na patut siurupan, asa marsihohot nasida marhaporseaon tu Tuhan Jesus Kristus.
6. Manopot jala mangapoi angka na marsahit, jala paturehon angka na ringkot di nasida, olat ni na tarpatupa. Alai na rumingkot pasingoton nasida marhite hata ni Debata dohot manangianghonsa.
7. Manogunogu jala mangapoi angka sipele begu, nang angka parpoda haliluon, asa dohot nasida marsaulihon hangoluan na sian Tuhan i.
8. Manogungogu ruas ni huria asa marroha hamauliateon, jala olo pasahathon angka pelean tu huria ni Tuhan Jesus Kristus ro di nasa na ringkot di harajaon ni Debata.

Sipahusorhusoron taringot tu ari “Minggu”

1. Ia so ture parmingguonmu, ndang ture nang ulaonmu siapari.
2. Molo dilaosi ho ari minggu, gabe sude ari i dipangulahon ho, ndang na manghorhon laba i di ho, balik tahe mamboan harugian do. Alai molo sian burju ni roham laho marminggu, ndang na rugi ho disi, alai tung na marlaba do.
3. Songon bilut parugasanan manang songon kas parpeopan ni arta na arga do ari minggu i. Sian do diuhal Debaga angka sibasabasana, laho mangalehon na ringkot tu tondim dohot tu pamatangmu.
4. Pitu ari do saminggu. Molo so adong di na saminggu i “ari minggu”. Mandok: ndang marminggu ho di ari i, tudos ma ngolumi tu sada Ijabu na so martarup, manang songon sada luat na so adong batang aek, manang songon sada dalan na tangging, na so adong paradianan.
5. Molo so marminggu ho di ari minggu, olo ma gabe ari panuundalion di Debata ari i bahenonmu di laonlaon ni ari,-gabe ari halupaan martangiang,-gabe ari hamamago ni hadaulaton, -gabe ari hadadao ni dame dohot ari parjeaanmu.
6. Sada ari minggu na sonang jala pinarbadiaan, i do songon soara ni giringgiring sian gareja bolon na di banua ginjang, na tabo situtu sibegeon, nang pe di haliangi hagaoron portibi on hita. 
7. Manang ise na so jolo martangiang laho marminggu, rangkak do i dapotan pasupasu laho muli.
8. Adong di deba halak, na so ringkot be rohana ro tu gareja, gabe dipungka di ibana “gareja roharoha”: ima angka na mandok: “Marminggu di dalan do ahu”; na asing laho mardalani tu balian, maridi tu batang aek manang tu topi laut, laho tu dolok manang tu tombak, laos manganmangan disi, dna. Ndang ari pangalapan na hasea tu tondi be ari minggu i di halak si songoni; alai jotjotan gabe parmulaan ni jea ma i di tondina dohot dagingna. 
9. Ingot ari paradianan i laho pabadiahonsa. 
10. Ianggo halak Kristen na burju sai diingot do na dua on, ima pabadiahon ari minggu dohot laho tu gareja marminggu. Dang olo manirang na dua i, tung dirahuti do i marhite tali haporseaon panghirimon dohot holong ni roha.  

ULAON PARMAHANION NI PARHALADO

Di rimpun ni ulaon ni Sintua hombar tu agenda HKI didok do “Marmahani dohot manangkasi parange nang ulaon ni ruas ni huria. Molo adong na hurang denggan parange ni manang ise ruas ni huria, ingkon pinsangon ni sintua marhitehite hata ni Debata, manang paboaon tu guru dohot pandita asa dipature. Alani disuru Debata do parhalado marhite huria i gabe ulaulaNa marmahani birubiruNa.  Marmahani do impola ni ulaonta  umbahen dijou marhalado. Asing do lapatan ni ulaonta (tohonanta) sian angka parhalado na di portibi on; ndada na gabe pejabat sidapothonon manang parhobas sihobasan hita. Dipabangkit gabe parmahan asa mangaramoti partondion ni sude angka birubiru anggiat bersemangat. Ulaon parmahanion ni parhalado digoari do i di hata Bolanda “Zielzorge”, di hata na asong “Pastoral Counseling”. Na mangulaon parmahanion i digoari “Counselor”; na pinarmahan i digoari “Couseli”.

Ringkot ni parmahanion.

“Ia ho anak ni jolma, nunga hupabangkit ho bahen parjaga di pinompar ni Israel, ninna Debata tu si Hesekiel, (Hes 33:7). Hombar tu ayat i na disuru Debata do angka parhalado gabe parjaga di birubiru ni Debata asa unang diago musu manang panangko. Alani do ingkon  tangkas do paingoton rus ni huria i asa dijamothon dirina sian parmaraan ni tondina. Mamereng godang ni parmaraan ni tondi na lam rarat di tingkon, tung balga do tanggung jawab ni parhalado marmahani ruas ni huria i marhite hata ni Debata. Di parngoluon ni jolma di perkotaan ala panghorhon ni modernisasi dohot hamajuon ni tehnologi. Lam hapal do ngolu na bersifat egois dohot individualis, alani lam tamba do jolma na terasing nang pe rame perkotaan i. Lam tamba do nian ragam ni parpunguan; punguan parsahutaon, parmargaon, alai lam maol jumpang ngolu na marsiurupan gariada lam godang persaingan hidup.

Marragam poda dohot soara na mangela ruas ni huria asa pinda sian haporseaonna. Ditubuhon panghorhon ni industrialisasi na serba elektronik i do ragam ni ni pangunjunan tu ruas na so dipersiaphon hian dope manjalo dohot mamangke alat elektronika i. 

Na niigil ni Debata sian hita mangulahon ulaon parmahanion i.

Pangoloion. 

Didok Tuhan Jesus tu siseanNa, “Ihuthon hamu ma Ahu, bahenonku do hamu gabe sijala jolma” (Mat 4:19). Dipasahat tu nasida ulaon manjala jolma, jala disuru manadingkon ulaonnasida hian. Marrumang parenta do joujou i, laos ihut tu parenta i do dibagabagahon pandonganion ni Tondi i dohot upa sijaloon (Pat Mat. 28:19-20). Di ulaon manjala dengke porlu do adong parbinotoan, pengalaman dohot keahlian, songon i do nang di na manjala jolma ringkot parbinotoan dohot hatauon,ima siguruhonon ni angka na jinou i sian Tuhan Jesus. Di ulaon manjala jolma ringkot do adong metode patulushon ulaon panjalaon i. boi do marragam metode di ulaon parmahanion dohot di ulaon mamaritahon barita na uli i. Alai narumingkot, ojahan ni metode i ima ngolu partondion ni parmahan i. ingkon porsea parmahan i di Jesus na manjou ibana. Pangkeonna ma holong mangulahon haparmahanion i. Gagal do parhalado mangulahon parmahanion molo so adong holong di ibana. Sada do dalan patubuhon holong ni roha di parhalado ima ringgas martangiang, jala ringgas mangulahon tohonan parmahanion i. Sai adong do sian parmahan i maol rohana mangulahon haparmahanion i ala sai mangasahon pingkiran dohot hagogoonna, dipapudi pandonganion ni Tuhan i. Dalan laho mangatasi i, ringgas marsiajar di hata ni Debata dohot martangiang mangido pangurupio sian Tuhan i. panghilalaan na so tau mangulahon parmahanion i naeng bolonghonon marhite na pasahat diri tu Tuhan i asa Ibana mangajari hita laho mangulahon ulaonNa i. UlaonNa do na tahobasi ndang ulaonta, alani di bagasan haserepon dohot haunduhon tu Tuhan i ma hita mangulahon i.

Haradeon (kemauan). 

Ndang marparbue ulaonta ala ndang adong di hita haradeon mangulahonsa. Alani di na manngula hita tingkot adong haradeon, kemauan mamelehon diri tu ulaon i. Nasa ulaon na niula ndang nionjar ni haradeon, kemauan ndang mampanghorhon las ni roha i di ibana. Ringkot keputusan na tegas sian hita na mandok, “Sipareahanku do patubuhon haporseaon ni ruas ahu marhite parange na denggan asa olo ruas i podaanku”.  Haradeon, pangoloion i naeng hangoluhononta songon pangoloion ni Parmahan na denggan roha in a sai mangalului anak na mago i (Pat. Luk. 15:7).

Partangiangon. 

Holan Tondi Parbadia do na boi mamornohi roha ni jolma na tapodai asa marhamubaon. Tondi i na boi padaohon haholomon sian roha ni na so porsea jala patiurhon roha ni jolma asa marhamubaon. Alani tarihot do ulaon ni parhalado tu pangulaon ni Tondi Parbadia. Alani ingkon jotjot do parhalado i mangulaho partangiangon i. 

Borhat manopot. 

Tangga na mangihut, borhat manopot. Inisiatif manopot ruas ingkon patupaon ni angka parmahan. Ndada holan hundul partohonan i paimahon laporan ni angka na nisuruna. Ingkon borhat manopot ruas  i nang pe marragam pangalaho dohot parngoluon ni ruas sitopoton i  huhut ingkon dohonon do hata ni Tuhan i tu ibana asa tarsunggul nasida di hata ni Debata. 

Pahombar diri. 

Ndang holan ditopot Tuhan Jesus jolma i, dipahombar do dirina. Songon Guru Jesus di angka partohonan, patut partohonan i maniru parrohaon ni Tuhan Jesus (Pil. 2:5-7). Dirumari Jesus do dirina laho pahombar diri tu jolma. Adong do hea sahalak partohonan, na patupa parmahanion tu angka gelandangan. Ganup laho ibana manopot gelandangan i sai dipahombar do bajuna tu angka gelandangan i, rap mangan jala rap minum. Dipanghilalahon angka sitaononnasida, ujungna marparbue do ulaonna i. Didok Apstel Paulus di 1 Korintus 9:22 “Hupahombar do diringku tu sasude, anggiat hupalua nanggo deba”. 

Maraleale. 

Ringkot do patuduhon paralealeon tu ruas i asa mura sian poda. Saleleng so tubu pos ni rohana tu dirinta ndang siat podanta tu rohana. Boi do hatop tubu paralealeon i marhite na mangargahon pangalaho na denggan na pinatuduhon ni ruas i tu hita. Isarana: disurdukhon sahalak parminum do sahali minuman alkohol tu sahalak parjamita. Ditulak parjamita i do minuman i, alai ndang dipinsang parminum i,alai didok :burju do ho amang manarihon donganmu”. Ala pandohan ni parjamita i na so mamintor manguhumi i marhasil do ibana paubahon parminum i gabe so parminum. 

Rumatangga ni parmahan i gabe poda. 

Rumatangga ni parmahan i do parjolo mual ni poda tu ruas. Munafik do angka parmahan na sai girgir mamodai na asing, hape rumatanggana marbadai. Panjaloon ni ruas di podanta ndang tarsirang i sian panghangoluhonon ni keluarganta di podanta. Alani ingkon patar di keluarganta habasaron, habengeton, hadameon dohot haringgason martamue. Margogo podanta i tu na asing molo mian na podahon i di rumatangganta. Unang gabe Partuktuhan parmahan i tu ruas ni huria. 

            

Cara patupahon parmahanion

Hombar tu partingkian na lam tu majuna, na boi do angka parmahan nian mamodai ruas marhite na manongoshon surat dohot telepon tu na pinarmahanna. Alai tung dumenggan dope marhite na manopot ruas it u jabuna be. Marhite bohi na minar dohot tangan na marsijalangan, hata na mangelek, panaili na lambok, hasabaron mananginangi do gumodang panghorhon ni pamodaion i tu roha ni na ni dapothon. Dipanopoton dohot di panghataion i ringkot parrohahonon:

Unang tinaringotan hagaleonna. 

Molo manopot ruas, patandahu haroronta laho pasingothon asa ringgas marminggu, atik i tujuan. Torop do sian parhalado na tarhirim ala mamintor mamodai na tinopotna i. tarhirim ala dialo na tinopotna i ibana, didok “Ndang ringkot au podaan”. Alani ringkot adong strategi di panghataion, unang tinaringotan hagaleonna. Marhitehon i, nilehon tu ibana pamingkirion dohot haputusan, ringkot do na marminggu manang ndang. 

Gumodang manangihon. 

Na tama do angka parmahan gumodang manangihon. Sude hata ni na tinopot i ingkon antusan i songon hataridaan ni panghilalaanna dohot ngoluna. Di angka panghataion jumpang hita do komunikasi na denggan molo adong haradeon ni ganup manangihon donganna manghatai. Dinamanangihon sipadao on do: Parjolo, sikap na mandok nunga huboto. Jotjot do angka parmahan mamintor mansurasura ni roha di hata ni na tinopotna, lumobi molo dung tinanda na tinopot i tukang kritik tu parhalado. Alani ganup ditaringoti na tinopot i huria dohot parhalado unang mintor ginotap panghataionna i. paduahon, sikap na mandok nunga tangkas haunts. Olo do pahatophu angka parmahan i manghatahon pangantusionna di masalah dohot panghilalaan ni na tinopotna i. Alani unang ma nian pamalomalohon haroroannta tu bagas na tinopotna i.      

Rade manangihon Kritik. 

Torop do sian angka parmahan mintor piripirion manangihon kritik, jala pabelahu tu tohonanna. Sude kritik na so denggan i ingkon alusan marhite alus na positif. Tanggapan na positip dohot sikap na so pabelahu di tohonanna i, i do modal di hita maodai angka sileai huria dohot tohonan i. 

Unang mahatophu mangalehon haputusan. 

Torop do halak mamaksahon keputusanna tu keputusan ni halak. Masa songon i ala ndang barani martanggungjawab di akitab ni haputusanna. Ibaratna: didok sada ama naung lansia naung tibu mabalu tu sada sintua na ro manopot ibana, “Sintuanami, nunga matua ahu, songon tandiang na hapuloan panghilalaanku, gogongku pe nunga lam sumurut. So adong be di huta on na olo mangurupi ahu. Tudia nama ahu lao. Di jabuon tinggal, ndang sintong. Tu jabu ni anakku, ndang mardomu u tu parumaon i. dia ma sibahenonku? Urupi ma jolo ahu sintuanami, lehon ma jolo haputusan sibahenonku”. Molo hita amanta sintua i bangga do hita ala dihormati mambahen haputusan taringot tu masalah na niadopanna. Ala penghormatan do i, boi do mamintor bahenonta haputusan so jolo tapingkiri akibatna. Parmaraan do haputusan na songon i ai ai gabe tatogutogu ibana mangulahon haputusanta, hape tujuan ni parmahanion asa mampu do na tinopot i mambahen haputusan taringot tu ngoluna. 

Denggan do molo tadok “ndang na so olo ahu mangurupi hamu, alai hurang dengganna molo ahu mamutushon. Las rohangku molo mardiskusi hita taringot tusi. Na huida, na jongjong do hamu di dua kemungkinan, tinggal di jabu on manang tinggal di jabu ni anakmuna. Pingkiri hamu ma jolo, panghilalaan na songon di do masa di hamu molo tinggal hamu di jabu on, manang molo tinggal hamu di jabu ni anakmuna i”. Marhite alus na songon i nilehon tu ibana panghirimon dohot mambahen haputusan na matang. Alai ingkon boi do hita di sada tingki mambahen haputusan tu masalah na niadopan ni ruas na so adong be panghirimonna.

Sensitif. 

Sensitif lapatanna boi umbege dohot mangantusi soara ni dongan manghatai na langet situtu. Adong kemampuan manangihon dohot mangantusi secara intensif na nidok ni dongan atik pe langet hata i. sai songon na adong radar na berfungsi gabe pinggol na patoluhon. Manangihon secara intensif ndang tarsirang i sian haradeon pahibul roha manangihon dohot menghargai nanidok ni dongan. Halak na sai olo pasangaphon na niangkupanna jumpang do sikap na sensitive. 

Emphati. 

Emphatic lapatanna dohot manghilalahon na nihilala ni na tinopot. Di na manopot na marsahit, na matean, manang na marsitaonon naeng jumpang di hita emphatic. Denggan do patuduhononta na dohot do hit manghilalahon na niaena i.

 

Ambivalent.

 Ambivalent lapatanna paraloan ni dua panghilalaan di diri ni sada halak. Ambivalent manuru hita pasadahon roha mananginangi pandohan ni sada halak. Sikap ambivalent boi botoonta sian panghataion na palobihu. Contohna: si tangkang mandok, ‘ai aha di huria i, ndang sahat iba tu banua ginjang dibahen huria i. Ndang parduli ahu tu huria i, ai so hea ditopot sintua i ahu. Boi do huurus diringki sahat tu banua ginjang. Sian pandohanna i patar tarida sihol ni rohana ditopot sintua i.   

Panimpuli 

Na tarjolu do hita gabe sintua/parhalado, parmahan laho pasahathon hatana tu ganup birubiru i. Didok Debata tu si Hesekiel “Molo Ahu mandok tu halak parjahat,ingkon mate do ho ale parjahat, hape ndang marboaboa ho palumba halak parjahat i tumundalhon dalanna i nian, mate do nian parjahat i di hajahatonna, alai ianggo mudarna sian tanganmu do tungguonku, (Hes.33:8; 3:17-19). Tung taparrohahon ma pandohan i asa taulahon ulaon haparmahanon i hombar tu panjouon ni Debata. #nn